Mashhur rejissyor, ssenarist va prodyuser Stiven Spilberg faqat tunda ko‘riladigan xorror-serial ishlamoqchiligini bildirdi.

Yangi loyiha 10 yoki 12 qismdan iborat bo‘ladi va Quibi mobil dasturi orqali taqdim etiladi.

«Spilberg mening oldimga keldi va “Menda qo‘rqinchli va kutilmagan syujet bor, shuni serialga aylantirishni xohlayman” dedi. Uning aytishicha, besh-olti qismini yozib tayyorlab qo‘ygan», – deydi Quibi asoschisi Jeffri Katsenberg.

Serialning xomaki nomi: «Spilberg zulmatdan keyin».

Serial syujeti oshkor qilinmaydi, Spilbergning rejasi bo‘yicha serial faqat yarim kechadan so‘ng namoyish etiladi.

Mobil qurilma foydalanuvchi joylashgan vaqt zonasini hisobga oladi va quyosh chiqishi bilan serial namoyishi to‘xtatiladi.

Quibi – qisqa videolarni (7 daqiqadan 10 daqiqagacha) namoyish qilishga mo‘ljallangan mobil qurilmalar uchun striming dasturi hisoblanadi. «Quibi»ning ishga tushirilishi 2020-yil 6-aprelga mo‘ljallangan. Investorlar loyihaga 1 mlrd dollardan ko‘proq mablag‘ sarflashgan. Ushbu xizmatga obuna narxi – 4,99 dollar.