20-iyul kuni O‘zbekiston xalq artisti Zohid Haqnazarov 82 yoshida olamdan o‘tdi.

Ko‘pchilik xotirasida Zohid Haqnazarov har qanday og‘ir sharoitda ham o‘z insoniy pritsiplariga sodiq qolgan, haqiqatni oshkora aytishdan cho‘chimagan haqiqiy o‘zbek ziyolisi sifatida qoladi.

  • Zohid Haqnazarov O‘zbekistonda "Birlik" xalq harakati asoschilaridan biri va hamraisi bo‘lgan.
  • U 2003-yili O‘zbekistonda og‘ir iqtisodiy va siyosiy vaziyat yuzaga kelganini aytib marhum prezident Islom Karimovga ochiq xat yozishdan cho‘chimagan.
  • O‘shanda professor Zohid Haqnazarov 15-20 AQSH dollariga teng maoshga O‘zbekistonda kun ko‘rish og‘ir bo‘lib qolganini, mamlakatdagi aksar zavod-fabrikalar to‘xtab qolganini yozgan.

Zohid Haqnazarov xalqdan tortib olingan demokratiyani qaytarish, so‘z va matbuot erkinligini joriy qilish, siyosiy partiya va harakatlarning O‘zbekistonda faoliyat yuritishiga, hukumatni tanqid qilishga ruxsat berilishi talabini qo‘ygan.

Aksar xalqaro tashkilotlarning yillik hisobotlarida 1999-yilgi Toshkent portlashlari ortidan O‘zbekiston rahbariyati diniy ekstremizmga qarshi kurashni bahona qilib o‘zgacha fikrlovchilarga ta’qibni kuchaytirgani tanqid qilingan.

O‘zining ochiq maktubida Zohid Haqnazarov Karimovdan o‘zgacha fikrlovchi insonlarga bosimni to‘xtatish, qo‘shni mamlakatlar bilan chegaralarni ochishni ham talab qilgandi.

Zohid Haqnazarov jurnalist Bobomurod Abdullayevning hibsga olinishini ham qoralagan, prezident Mirziyoyevdan jurnalistni ozod qilishni so‘rab murojaat etgan edi.

"...56 yil rus chorizmi mustamlakachiligini, 70 yil bolsheviklar repressiyalarini (ular ham ruslar), 26 yil mobaynida Islom Karimov buyrug‘i bilan qotilliklarni boshidan kechirgan o‘zbek xalqini, o‘zbeklarni himoya qilayotgan mard yigitimizga ming rahmat deyishimiz va bugunning o‘zidayoq unga haykal qo‘yishimiz kerak. Qachongacha bir-birimizning boshini yeb, boshqa xalqlar oldida sharmanda bo‘lib yuramiz? Uyat!

Men O‘zbekiston prezidenti Shavkat Mirziyoyev konstitutsiyamiz garanti sifatida so‘z erkinligini saqlab, yigitimiz Abdullayev-Haqnazarovning ozodlikka chiqishiga o‘zining insoniy hissasini qo‘shishini istardim...", – deya murojaat qilgan edi Zohid Haqnazarov.

  • Zohid Haqnazarov 1937-yil 12-noyabrda Toshkentda tug‘ilgan.
  • 1963-yili Moskva konservatoriyasini dirijyorlik mutaxassisligi bo‘yicha tugatgan.
  • 1979-yilgacha O‘zbek davlat filarmoniyasi simfonik orkestriga rahbarlik qilgan.

"U ko‘pchilik o‘zbekistonlik kompozitorlarning simfoniya janridagi asarlarini birinchilardan bo‘lib talqin qilgan. Masalan, "Samarqand hikoyalari", "Pochta", "Poema-rapsodiya", "Simfoniya", "Toshkent manzaralari" va boshqalar. Rimda o‘tkazilgan xalqaro dirijyorlar konkursida diplom bilan taqdirlangan", – deyiladi Zohid Haqnazarovga bag‘ishlangan maqolada.

Zohid Haqnazarovga 1978-yili O‘zbekiston xalq artisti unvoni berilgan, u "Hurmat belgisi" ordeni va medal bilan mukofotlangan edi.

Bi-bi-si o‘zbek xizmati tahririyati Zohid Haqnazarovning yaqinlariga ta’ziya izhor etadi.

Video parcha kinodokumentalist Abdulaziz Mahmudovning "Amir Temur soyasida. Garovdagilar" hujjatli filmidan olindi.