Тожикистонда «миллий маданиятга ёт» бўлмиш кийим-кечакларни олиб кириш ва сотишни тақиқлашмоқчи. Бу ҳақда ижтимоий тармоқларда сиздирилган ҳукумат мажлиси баённомасига таяниб Tarjumon.uz хабар бермоқда.

Президент девонининг раҳбари Озода Раҳмон (Тожикистон президентининг қизи) 29 июлда имзолаган ва баённомада «миллий урф-одатларга ёт бўлган кийим-кечаклар» ибораси айнан қандай кийимларни англатишига аниқ шарҳ берилмаган.

Махфийлик муҳри босилган ҳужжатнинг ижроси Ички ишлар вазирлиги, Миллий хавфсизлик давлат қўмитаси, Дин ишлари, урф-одатлар ва маросимларни тартибга солиш бўйича давлат қўмитаси, Аёллар ва оила ишлари бўйича давлат қўмитаси, Божхона хизмати, Исломшунослик маркази, Ислом маркази уламолар кенгаши ва бошқа марказий ва маҳаллий ҳокимиятларнинг раҳбарларига топширилди. Тожикистон ҳукумати ушбу сиздирилган махфий ҳужжат юзасидан расмий изоҳ бермади.

Гўёки миллий либосларни оммалаштиришни кўзлаган ҳужжат Тожикистонда анчадан бери давом этаётган аёлларнинг исломий кийинишига қарши кампаниянинг қисми бўлиши мумкин.

Кўпгина давлат ва ижтимоий муассасаларда, шу жумладан шифохоналарда, мактабларда ва ФҲДЁ идораларида аёлларга ҳижоб ва чодраларда (бошларини ва бўйинларини ёпадиган ҳижоб) кириш тақиқланган. Гувоҳларнинг сўзларига кўра маъмурлар жамоат жойларида ҳижобда юрган аёлларни тўхтатиб, улар хақида маълумотларни қайд этиб қўядилар ва рўмолни «тожикча» (қисқача ва орқага) боғлашни талаб қиладилар.

2015 йилда Душанбе шаҳрининг ўша пайтдаги ҳокими Маҳмадсаид Убайдуллоев барча дўконлардан тожикча кийиниш тарзига тўғри келмайдиган кийимларни мусодара қилишга буюрган. Тожикистонда «тожикча кийиниш тарзига тўғри келмайдиган кийимлар» деганда баъзи Яқин Шарқ мамлакатларида урф бўлган мусулималарнинг қора рангли либослари тушунилади. Шунингдек, тожик парламенти 2017 йилда миллий кийимларни кийишни ва давлат тилини билишни мажбурий қилиб қўйган.

Республикада ҳижобга қарши кураш инсон ҳуқуқлари фаоллари томонидан виждон ва дин эркинлигининг бузилиши сифатида танқид қилиб келинади.