Россия президенти Владимир Путин 8 июлдан эътиборан авиакомпанияларга Россиядан Гуржистонга йўловчи ташишни тақиқловчи фармонни имзолади.

Фармонда шунингдек Гуржистондаги барча россияликларни ватанига қайтариш назарда тутилган.

"Аэрофлот" Тбилисига парвозларни тўхтатаётганини эълон қилган.

Фармонда шунингдек Гуржистондаги барча россияликларни юклари билан бирга ватанига қайтариш назарда тутилган.

Путиннинг матбуот котиби Дмитрий Песковнинг айтишича, Гуржистондаги вазият барқарорлашганидан сўнггина парвозлар қайта тикланиши мумкин.

"Гуржистондаги вазият нормаллашиши ва бизнинг ватандошларимизга барча таҳдидлар йўқолиши керак", – деган Песков РБК нашрига.

Россиядаги сайёҳлик ширкатлари берган маълумотларга кўра, ҳозир Россияда 5-7 минг орасида ташкиллаштирилган сайёҳлар бор, ўзи сафар қилганлар сони бундан икки-уч баробар кўп бўлиши мумкин.

Россия ҳаво ширкатлари Гуржистонга чипта сотишни тўхтатгани ва чипта эгаларига пули қайтарилишини эълон қилган.

Гуржистонда оммавий намойишлар учинчи кун давом этмоқда.

  • Намойишларга сабаб Россия Давлат думаси депутати Сергей Гавриловнинг мамлакат парламенти раиси ўтирадиган минбарга кўтарилиб, русча нутқ ирод қилгани бўлган.
  • Жумага ўтар кечаси полиция Тбилиси марказидаги намойишчиларни тарқатиш учун кўздан ёш сиздирувчи газ, резина ўқлар ва сув сепувчи машиналарни ишлатган.
  • Ҳукумат аъзоларининг истеъфосини талаб қилган намойишчилар парламент биносини эгаллашга ҳаракат қилганлар.
  • Гуржистон соғлиқни сақлаш вазирлиги маълумотларига кўра, тўқнашувларда 240 киши жабрланган.
  • Улардан 80 нафари полиция ходимларидир.
  • Гуржистон ИИВсига кўра 305 нафар намойишчи ҳибсга олинган.

21 июн куни Гуржистон парламенти раиси Ираклий Кобахидзе истеъфо берган.

Гуржистон президенти Саломе Зурабишвили Тбилиси марказидаги тартибсизликларни "фожиа" деб атаган ва барча сиёсий кучларни бирдамликка чақирган.